Minnistruflanir Sjálfstæðismanna

Ég mundi hafa af því verulegar áhyggjur, væri ég flokksmaður í Sjálfstæðisflokknum, (sem ég er ekki sem betur fer) að hafa þetta blessað fólk við stjórnvölinn, hvort heldur er í Reykjavíkurborg, í framkvæmdastjórn flokksins eða á hinu háa Alþingi fyrir hans hönd.

Og í hverju væru áhyggjur mínar fólgnar, jú þeir muna bara ekkert stundinni lengur. Það er auðvitað mjög bagalegt þegar prókúruhafi flokksins man ekki stórar peningahreyfingar á reikningum flokksins. Þegar borgarstjórinn (VÞV) gleymir eins og skot samningum sem búið er að gera og GÞÞ man heldur ekki hverja hann bað um að betla pening fyrir þrem árum. Og þaðan af man hann hverju betlið skilaði í kassann. Þetta er nú ungur maður og í fæði hjá einum helsta heilsuræktarfrömuði landsins.

Er það kannski ástæðan fyrir því að þingmenn flokksins hafa beðið svo oft um orðið nú undanfarið á Alþingi. Þetta er sko ekkert málþóf, vesalings fólkið er bara strax búið að gleyma því sem sagt var í gær, svo ekki sé talað um í fyrradag og er alltaf að tala um það sama aftur og aftur. Er að tala um málið í "fyrsta sinn" dag eftir dag.

Sem betur fer er forseti Alþingis búinn að ákveða að stoppa þessa biluðu plötu og hefur lýst því yfir að þing verði rofið í vikunni. Hann er líka Samfylkingarmaður og ekki smitaður af þessu minnistruflunum, sem betur fer. Vonandi verður endurnýjað vel í þingmannaliði Íhaldsins og gengið úr skugga um minnis heilsu fólks áður en það sest á þing.

Athugasemdir

[Finnur Bárðarson, 13.4.2009 kl. 17:03]

Þessi ákvörðun Forseta þingsins mun ríða BIrgi Ármannssyni að fullu.

[Hólmfríður Bjarnadóttir, 13.4.2009 kl. 17:33]

Aumingja BÁ, ég segi nú ekki annað og það eftir þessa miklu hamfarapáska.