Hver gerði hvað, hvenær og hvar.

Töluvert púður fer í það nú um stundir að velta upp einstökum atburðum fyrir hrun og í hruninu og túlka þá á ýmsa vegu. Við vitum að lög voru brotin í einhverjum mæli og kannski verulegum. Þar til hvatt fólk vinnur við rannsókn og á sennilega nokkuð í land, en eins og Eva Joly hefur sagt, þá mun slík rannsókn taka tíma.

Það hefur ætíð verið til lítils að deila um keisarans skegg eða að snúa út úr staðreyndum. Óstjórn Íhalds og Framsóknar varðandi gefins veiðiheimildir á íslandsmiðum, sölu/afhendingu bankanna til flokksgæðinga, tilraunastarfsemi með ónýtan gjaldmiðil og skiptingu annarra atvinnuvega milli valdablokka flokkanna um árabil, hefur leitt okkur hingað sem við stöndum nú.

Þó verið sé að togast á um einstaka atburði, breytir það ekki heildar stöðunni. Núverandi ríkisstjórn er með fangið fullt að óreiðumálum forvera sinna til úrlausnar og þar er unnið af mikilli festu við að koma samfélaginu á lappirnar að nýju. Við skulum bara þakka fyrir að við bárum gæfu til að veita þessum tveim flokkum umboð til að stjórna landinu okkar út úr brimskaflinum.