Verðtryggingin heyrir brátt sögunni til.

Ég fagna því mjög að verðtryggingin muni brátt heyra sögunni til. Ég hef oft spurt mig að því síðustu mánuði, hversu margar vinnustundir af minni stafsævi, hafa farið eingöngu í að vinna fyrir verðtryggingunni af þeim lánum sem ég hef tekið og greitt af um dagana. Þær eru örugglega æði margar og þegar ég hugsa um tímann frá því verðtryggingin  var tekin upp og til dagsins í dag, er hún það eina sem ég er verulega ósátt við. Af þeirri einföldu ástæðu að hún  var og er skattur fyrir það að hafa okkar ónýtu krónu.

Hrunið sem slíkt hefur ekki valdið mér miklu hugarangri eða ergelsi. Það tel ég vera rökrétta afleiðingu af hagstjórn umliðinna áratuga. Stóri kosturinn við hrunið er á mínu mati að nú verður algjörlega skipt um gír, tekið til og lagt upp með nýjar áherslur. Það mætti segja mér að eftir nokkur ár muni margir hugsa með hryllingi til þeirra ára þegar verðtryggingin hélt öllu í greyp sinni, Þegar Kolkrabbinn og SÍS skiptu landinu með sér, þegar einkavinavæðing og valdaklíkur voru allsráðandi, þegar Davíð bjó til sitt eigið tilrauna regluverk í peningamálum, þegar kvótakóngar átti fiskinn í sjónum o. s. frv.

Athugasemdir

[Jóhann Elíasson, 18.7.2009 kl. 09:40]

Það er gott að vera bjartsýnn en ég get því miður ekki séð að verðtryggingin fari af við það eitt að ganga inn í ESB, til þess að svo verði þarf að taka upp evruna og við einfaldlega uppfyllum ENGIN skilyrði til þess.  Hefðum við sótt um aðild að ESB fyrir tveimur árum vorum við mjög nálægt því að uppfylla skilyrðin, eina skilyrðið sem við uppfyllum ekki var að verðbólgan var ekki innan marka en ég er nokkuð viss um að við hefðum fengið UNDANÞÁGU frá því ákvæði en í dag tel ég vonlaust að við fáum undanþágu frá ÖLLUM skilyrðunum.

[Valgeir Matthías Pálsson (IP-tala skráð) 18.7.2009 kl. 13:59]

Það er vonandi að hún verði afnumin. Þetta er böl á íslensku hagkerfi að hafa verðtrygginguna við líði hér á Íslandi. Það er ekkert flóknara en það. Eigðu góðan og ljúfan dag Fríða mín.

[Jóhann Elíasson, 18.7.2009 kl. 15:02]

Að sjálfsögðu á að afnema þessa óværu, sem verðtrygging á lánum er, það sem meira er það hefði átt að afnema hana um leið og verðtrygging var afnumin af launum.  En því miður var það ekki gert og síðan hefur óréttlætið verið að "naga" í okkur venjulega fólkið á meðan góssentíð hefur verið hjá fjármagnseigendum.